జాతీయ సమైక్యతా"వాణి" ఎం.ఎస్ సుబ్బలక్ష్మి

కంఠంలో దాచెనేమో సుధాభాండాగారం

పండితపామరులను సైతం రంజింపజేసెను ఆ గాత్రం

మధురైలో పుట్టిపెరిగిన మణిమాణిక్యం

లాలిపాటలోనే ఆలకించెను వీణానాధమాధుర్యం

అమ్మ పెట్టిన గోరుముద్దలే సరిగమపదనిసలు

నాన్న నేర్పిన తొలిపలుకులే సంగీతస్వరాలు

వేసెను మొదటి అడుగులు భక్తి మార్గంలో

చేసెను సాధనలు సుస్వరరాగఝరీధారలో

బడిలో బెత్తంతో బెదిరించి దూరమయిన విద్యను

గుడిలో గానంతో మెప్పించి గాత్రమున కలుపుకొనెను

మధురగాన ప్రవాహానికి కదిలివచ్చిన ఆ "సదాశివుడు "

మార్గము చూపి గురువై, మనసిచ్చి సగభాగమయ్యడు

వెండితెరపై జనరంజని "శకుంతల"య్యెను

"మీరా"గా జాతిగుండెలకు చేరువయ్యెను

'కౌసల్యా సుప్రజారామా' అన్న సుప్రభాతానికి మేల్కొనిన వెంకటేశుడు

'భజగోవిందం మూఢమతే ' అన్న కీర్తనకు ముగ్దుడైపోయినాడు

ఆధ్యాత్మికారాధనలు గాత్రంలో చేరి వికసించెను "పద్మ"మై

దశదిశలా సంగీతసౌరభాలను వెదజల్లెను గానగంధర్వమై

సాంప్రదాయ బాణిని తన గళంలో దాచిన 'సంగీతకళా'నిధి"కి

'భారతరత్న"యే కోరివచ్చి హారమయ్యెను ఆ కంఠసీమకు